Meys Beggäried / Beckenried

 In Gedichte

Ich luägä us am Feischdär,
da gsehnis, meys Beggäried
Äs leyd vor miär und luägt mich aa
Ja – d’Chilä isch zmitzt im Dorf
Ja – so scheen gmiätlich hemärs hiä!
Ich luägä us am anderä Fäischder,
da isch er, dä scheenschti See,
dä Beggriäder See!
Jedä Tag anderscht,
niä gleych,
immer ä andäri Luinä,
wiä miär Mänschä ai!
Kei Tag gaht värbey,
wo miär änand nid zuä blinzlid!
Trejw isch är –
Er isch immer da!
Er gahd niä ä wäg!

Ich säubär bi aber gangä
go umä fäikä,
bis as anderi Ändi vo dä Wäut.

Z’Feyrland bin ich gsi –
S’Feyr hed nimmä brennt.
Z’Los Änscheles bin’ich gsi –
Änglä ha ni käni g’seh,
anänand uf ä Grind gäh händ si sich,
diä huärä Strohseck.
Z’Madagaskar han ich ä chley gläbt,
Mit Totä han ich tanzt!
Ai z’China bin’i gsi –
Ä huärä Ameisihuifä!
Pyramidä ha ich nu gseh –
Sogar drininä bin’i krochä.
Dä Pharao isch nimmä umä gsi.
Ja – ja, scheen isch äs zäntumä
Zwar händs anderscht gred,
ai anderscht uisgseh hends
…und ai anderscht hends gstunkä
ABER – frindli und nätt sinds aui gsi!!

Ja! und wenns rägnät (oder schiffäd)
bi miär drheimä
Da chent mä meinä,
dr Himmu häig Schampagner gsuffä
Und wenns Friählig isch,
bruicht d’Natuir s’beschti Parfüm!
Mä muässäs nur chennä schmeckä
Im Summer scheen warm, aber doch nu frisch,
mär läbt grad uif!
Im Herbscht aui tuisig Farbä
Wo dä Schepfär erfundä hed!
Und im Winter gids ä weyssi Dechi,
drundert verschlipf ich mich,
aber nid allei!!!!

Ja und
vom obärä Fäischder
Da gsehn ich sie –
meyni Bärgä.
Sie verwandläd sich immer,
i denä Chleidli
vo dä viär Jahreszeytä!
Im Yves Sankt Laurent chäms amu nie z’Sinn,
soo scheeni Korsettli z’kreiirä.

Ja, – nach so langär Zeyt
wo ich ä wäg gsey bi
SIE sind immär da blubä
Mejni Bärgä!
Mey See!
Meys Dorf!
Ich ha di eifach gärä……..
Meys Beggäried!

Beckenried Vierwaldstättersee